عمتو نادية بحس إنها ما ماتتش وخصوصًا إني ما رحتش لعمتو فادية من بعد ما ماتت عمتو نادية - اللي كانت عندها في البيت أثناء مرضها - غير مرة واحدة بس...
عمو نور زوج عمتو فادية بحس إنه مسافر مش ميت خالص.
اليوم مش عارفة ليه حسيت إن شيخ عماد الدين اللي مات عايش وحسيت الإحساس دا بقوة وكأنه يتمثل أمامي بصدق الرؤية.
لو رجعت لأحلامي كلها مع تيتة أقسم إني أحس في كل حلم بشوفها فيه إنها بتبقى عايشة وبكلمها وتكلمني وأمشي معاها وأطلع ونهزر ونضحك وتمسكني وكأنها بالظبط عايشة، واللي أكد لي إنها عايشة لما قالت لي بنفسها: أنا عايشة أنا عايشة وأخويا محمد بيموت!
ساعتها بالفعل حسيت إنها عايشة...
يوم لما زرت طنط بطة مرات خالو سعد وحكيت لها الحلم اللي شفت فيه كل إخوات تيتة الرجالة: خالو محمود كان أبرزهم في الليلة دي وكانوا في فرح وشفت لمبات الفرح الملونة حواليهم كلهم وهما كلهم أكدوا لي إنهم في فرح، ساعتها طنط بطة قالت لي إنهم بيتنعمون في الجنة واحنا هنا فاكرينهم ماتوا..!
ولما لقيت اسم فادية بيرن على التليفون، حسيت ساعتها إن فادية بنت خالتي اللي ماتت هي اللي بتتصل، بس كدبت روحي بسرعة وافتكرت إنه اسم عمتي وإنها ممكن هي اللي تكون بتتصل بيَّ.
بس حقيقي وبشدة كمان أنا في ناس ماتت وبحسهم عايشين معايا.. على الأقل بحس بيهم بيتمثلوا أمام عيني أحياء...
ليست هناك تعليقات:
إرسال تعليق
أشكر لك المتابعة والتفاعل بالتعليق