سجن المهابيل

طلع من جيبه مرايه و مشط و سرح شعره و قال يا فكيك.

لما اتخانقوا في وشه عيال الحتة اللي بياكلوا الشاي و الكيك.

و ف حضن الضلمة هناك و بعيد

عن وش حمادة و توتو و لولة و سوسو و ميدو كمان

رمى نفسه و مد إيديه ياكل في اللقمة المتعاصة مربى و جبنة

- الله على عيشة الحرية

صرخ المهبول الأول

أصل المقاطيع لما اتخانقوا رعبوه

و حلف ما يبان وشه ليهم و لا حتى يعد ف خطاويهم

و مين يقدر على بلطجة الزحمة ف وسط الناس ما هي تايهة الكل بيدور على حيطة يعلق عليها بلاوي ولاده؟

و لا احفاده؟

أصل المظاليم

مساكين

مساكين

محابيس و كمان مهابيل

و الضلمة ياما بتخبي و تخفي و تلهي

أما المهبول التاني هيعمل إيه؟

ما هو ياما اتخانق لما عترله ف شغلانة

و الغلبانة

أمه فاطمة الدعياله

تشوف فرحه و خلفته و عياله

قبل اما تموت

زغرتوا ف الحتة

و جابوا الشيخ و المأذون

و التيتت

و التوت

و ع المكتب مرزوع من ستة الصبح عشان الكام ملطوش

بيجيبو ف آخر الشهر

و الشهر يجيب ف الشهر

و المهبول جاله بهلول

شد ف حيله و سحب خيله و قوام راح هوة و صاحب عمره و جابو التاكسي

من شبرا لرمسيس و الماكسي

أصل العيشة لازمها الفيشة و شوية سعي و تحبيشة

و ف سجن المهابيل من ستة الصبح يبات و يقوم

علشان يجري على قوت عيشه و يجيب المم، هلاهيل و هدوم

و ف سجن المهابيل برضو لقيت

واحد من سبعة الصبح على القهوة بياكل في سميط

حالف للنداهة تندهله تجيب له ف خير...تزرع له الغيط

و الضلمة هناك بتمد دراعتها هتاخده ف أحضانها

و الناس جريت زي أسود الغابة بتجري تلحق صيد

و صاحبنا ماشي بيتلطع باصص للحيط

و ف ليل العتمة هناك قطر محمل

جايب للنور زمارة و طبلة و مزيكا
و الشيكا بيكا

راجع و محمل

في الدنيا ما له أبداً يتأمل

ماشي ف سكة

آخرتها لفين؟

مهابيل مهابيل
ماشية بطراطير
و الضلمة بتسرق أحلامهم
بتغطي عليهم أوجاعهم
و الفرح مسكن يبلعهم
أصل الدنيا

...

مليانة مهابيل

و مع أول ألم

اعترف الجبان
و باح بالسر المخبي.
مع أول ألم نسي الهوان اللي بيدوقه كل يوم يمرغ فيه راسه في تراب جزم سياده عشان لقمة بردة متلحسة بهاريز العضم اللي بيرميه جزار حارتهم على جنب يمصمصوا فيه الكلاب.
مع أول ألم
تعب الجبان و هانت عليه العشرة.
هي العِشرة برضو هتجيبله إيه؟
أصل القهوة اللي اتلطع عليها من ساعة ما أخد ورقته بعد ما كان كل سنة بيسقط و يطلع بمواد في الكلية، معليهاش غير الصيع اللي بيشموا كلة و بيحششوا و ف آخر الليل بيرتموا ف أحضان السرير يشكوله همهم.
مين منهم هيدافع عنه؟
و لو دافعوا عنه هيكون مصيره و مصيرهم إيه؟
هرب الجبان.
من أسوار السجون الصغيرة إلى أسوار السجون الكبيرة.
رجع الجبان للقمة الردة المتلحسة ببهاريز العضم.

قالت يا جمال العُشِّ!

أتمنى أن تتذكروا معي اللحظات الدراسية الجميلة التي كنا نتجول فيها بين نصٍّ و آخر و ننهل من معانيه و نتعلم من زخائر لغتنا الجميلة
كنت في السنوات الابتدائية الأُوَل و كان أخي يكبرني بعامين فقط و كنا نتنافس على النصوص و حفظها و كنتُ أًصاحبُ من يكبروني بأعوام و أتمنى أن أكون مثلهم
و مما كنتُ أسمعُ من أخي أتذكر اليوم:
رأيت في بعض الحديث قُبَّرَة

قلت يا جمال العشِّ..حافظ على الجناح الهشِّ

و لو تأنى نال ما تمنى..و عاش طول عمره مهنى

دائماً أرى أخي أمامي و هو يقول لي هذه الجملة: و لو تأنى نال ما تمنى.. و عاش طول عمره مهنى

أتذكر كذلك شعر النيل الجميل الذي درسناه أيضاً
النيل العذب هو الكوثر
و الجنة شاطئه الأكبر
ريان الصفحة و المنظر
ما أبهى الخلد و ما أندر

كلماتٌ جميلة لمعانٍ عظيمة
كنت أتمنى أن تحفظها أختي الصغيرة و بنات أخوالي و خالاتي و أبنائهم
لكن بكل أسف تغيرت المناهج الدراسية لتزول المعاني اللطيفة الجميلة المؤثرة
و ... ألتقي بكم في معانٍ أخرى قريباً أتذكرها معكم.