مش ممكن أبتدي السنة الجديدة من غير ما أقول إن السنة اللي فاتت عدت عليَّ صعبة قوي زي السنين اللي قبلها من غيرك يا تيتة.
عارفة أكتر حاجة بتخليني أتعب قوي من غيرك؟ إن الحيطة بتجيب برد.. أيوة بتجيب برد جامد قوي. وكل حاجة بتجيب برد شديد قوي قوي قوي. مش عارفة أنام يا تيتة.
فاكرة لما كنت بنام جنبك وتدفيني؟
طيب فاكرة لما كنت أنسى أحط المخدة وكنتِ تزعقي لي وتحطيها بنفسك ع الحيطة عشان الحيطة ما تجبش برد عليَّ؟
أقولك إيه يا تيتة..
طب فاكرة لما كنتِ تحضنيني قوي علشان البرد والدنيا تبقى في منتهى الدفا؟
مشتاقة للدفا يا تيتة...
بحاول أتدفا ومش عارفة. بفكر لو أنا في بيت ومش حاسة بالدفا طب والناس اللي بايتة يا حرام في العراء وف عز الشتا البارد دا ومتغطيين بس ببطانية أو اتنين.. كان إيه بيدفيهم يا تيتة؟
طب كان إيه بيدفيني أنا وأنتِ؟
لو الدفا بطاطين ما كانش الواحد شعر أبدًا بالبرد، بس الدفا أكبر من مجرد بطانية ولحاف قطن تقيل.
الدفا كان قلبك وحضنك يا تيتة.
ليست هناك تعليقات:
إرسال تعليق
أشكر لك المتابعة والتفاعل بالتعليق