من حقي أقولها كتييييير.. وحشتيني. بس جميل إن ذكرى جميلة مرت عليَّ معكِ لسه بفتكرها وكأنها امبارح. فاكرة يا تيتة لما كنتِ بتحكي لنا حدوتة نوبان؟؟ وبلاد تشيلها وبلاد تحطها... ولا فاكرة لما كنتِ بتحكي لنا عن كَبَّر اللي بياخد العيال اللي ما تسمعش الكلام؟؟ طب فاكرة بقى لما كنتِ تغني لي؟؟ إياك نسيتِ لما كان يدور بياع القصب ونجري ع الشباك نتنطط ونرجع لحضنك ونطلب وتقولي روحوا جيبوا الكيس؟؟
ولا الزمان ضاع مننا!!
وبسرعة تطلعي لنا ربع جنيه بحاله ننزل نجيب عودين قصب أطول مننا مترين
وقبل ما يجينا القصب كنا نجيب صينيتك الألامونية الكبيييييييييييرة ونحطها ونترص حواليها كدة
ولا السكينة الألامونيا برضو لما كنت تقعدي في النص وتخرطي القصب خرط مستطيلة رفيعة وتفرقي
دا منابك ودا مناب أختك
****
لسه فاكراني يا تيتة بالضفاير لما كنت أنزل أجيب الفول والعيش الصبح ع الفطار؟؟
كنتِ تديني الفلوس وتقولي بربع جنيه فول وبخمسين قرش عيش
وانزل أجيب
ولما أرجع يترصوا كل ولاد خالاتي والخالين
فاكرة يا تيتة الكلمتين؟؟
هما هما ما تزوديش عليهم الحروف
"كلوا نونو نونو يا ولاد، وكل واحد ياكل من قدامه!"..
وحشني كلامك يا تيتة مع الجيران
وحشتني حدوتة نوبان
ووحشني أكبر عود قصب نترص حوالين الصينية تقطعيه
ووحشني موووووووت لما الشقاوة تاخدنا ونوزع في عفشك البيوت
ورا الكراسي قعدتنا دايمًا كأننا في قصور ياقوت
وحشني جريك ورانا بالخرطوم لما كنا نبل سجادتك بمية القلة التقيلة
وحشتني مووووووت سندوتشات السكر
وحشني جريك ورانا في الأوض
وزعيقك اللي يجلجل لما نتشاقى على السراير واللحاف
وحشتني موووووت أيام زمان
ما في أجمل من الذكريات ..
ردحذفربنا يرحمها ويصبركم على فراقها ..