أشياء تلح على ذاكرتي

كنت أنا وشقيقي الذي يكبرني إذا ما أصيب أحدنا بالسعال حرصت أمنا على أن تضع لنا "السبرتو والجرنال" على صدر كلينا يوميًّا قبل النوم. أما طقوس ما قبل النوم فهي كالتالي: مش هتغسل رجليك ووشك وأسنانك؟

- يوووه يا ماما هو كل يوم؟

- بتقول يوه؟ مش كدة عيب تقول لماما كدة؟
- آسف/ة يا ماما
-ياللا امشي ع الحمام. عارف اللي مش بيغسل أسنانه قبل النوم بتيجي الشمامة بالليل تشم أسنانه ولما بتلاقيها ريحتها وحشة بتاكل بقه كله.
ونعيشُ أنا وأخي على وهم الشمامة حتى كبرنا وتزوج أخي وتذكرنا الشمامة لنُخيف بها طفله فيغسلُ أسنانه..... :.)

- ياللا وريني كدة أشم ريحته..... اللــــــــــــــــــــه!! ريحة خده جميلة بالصابونة(يا جماعة زمان كانت صابونة لوكس دي بطول وعرض العيل مننا مش المسخوطة بتاعة اليومين دول) وريني بقى ريحة بقه.......... اللــــــــــــــــــــــه!! ريحة بقه جميلة أهو كدة الشمامة مش هتيجي تاكل بقه وهو نايم.

كان ينام في سريره الذي لا يختلف كثيرًا عن سريري سوى في أنه قد قام بلصق بعض الملصقات الصغيرة عليه ليميزه... وطبعًا أنا محرم عليَّ فعلها.

- إيه دا مش هتقول لبابا وماما تصبحوا على خير وتديهم بوسة قبل ما تنام؟؟؟

- حاضر يا ماما

أوقات كنتُ أريدُ أمي أن تنام معي في السرير وأبي كان ينام بجوار أخي

- البنات يناموا جنب البنات والصبيان يناموا جنب الصبيان.

ذات مرة قمنا من نومنا أنا وأخي فلم نجدهما بجوارنا فذهبنا لغرفتهما نفتش عنهما وإذا بهما ينامان معًا فقلنا لهم: - مش البنات يناموا مع البنات والصبيان يناموا مع الصبيان؟؟؟ بتناموا جنب بعض ليه بقى؟ :.)

*****************

اللبوسة

شيء غريب كنت أكرهه أنا وأخي لكنه كان شيئًا لا بد منه إذا ما ارتفعت الحرارة.

الأغرب أنك إذا ما كنتَ تنام وحدك في سريرك تشعر فجأة أن شيئًا ينغرسُ في ..... !!! وتتأوه منه، لتقم والدتك بتهدئتك وتقول: مفيش حاجة. لتستيقظ متنبهًا أنها أعطتك الحقنة. :.)

*****************

الأكل عليه إيه؟؟؟؟

كنتُ عندما نبدأ في تناول الطعام إذا ما شرع أحدنا في النقاش أقول بصوتٍ عالٍ: ها الأكل عليه إيه؟؟ فيرد باقي الأفراد: أدب واحترام.

:.)

صرتُ أقولها كلما سمعتُ أحدًا يتحدث عند تناول الطعام.

*****************

التليفزيون

-ما ليش دعوة أنا عايزة أشوف الفيلم يا باباااااااااااااااا
-يا ماما أنا عايز أشوف الفيلم التاني

- هو التليفزيون بتاعك أنتَ لوحدك يا أخي بقى؟؟

-- عارفين إن ما سكتوش هاجي بالحزام وهقطعكم (بابا)

شششششششششششششش سكوت

*****************

التموين

مين هييجي يجيب معايا التموين؟

-أنا -أنا

- لأ أنتَ رحت المرة اللي فاتت. أنا بقى اللي عليَّ الدور

بعد شراء التموين

- مين هيفضي معايا أكياس الشاي؟؟؟

- هيييييه أنااااااااااااااا

أكياس شاي التموين كانت بيضاء وعليها أشكال باللون الأزرق.

شوية شوية التموين بقى من غير شاي

أصلهم اكتشفوا إن الشاي في التموين فيه نشارة خشب :.)

بعدها ظهرت : اشرب شاي الفراشة هتشوف وشك ع الشاشة

شاي العروسة واااااااااااااا يا حبيبي جيب لي

شاي البراااااااااااد الأزرق

أعتقد إن مصر كانت فيها أنواع شاي أكتر من التعددية الحزبية الآن. ههههههههههه

على فكرة دي البداية ولسه في حواديت وذكريات تانية كتير في انتظاركم

:.)