العيد بالونة وفستان بكرانيش منفوش خالص ووردة بلدي بريحة تجنن ولون بمبي تخطف عينك وتشدك بريحتها

العيد زمان كان عندي بيسبقه يوم تاخدنا ماما وننزل نلف على كل محلات اللعب. أنا لعبة بنات، وأخويا لعبة صبيان. لعبة العيد حاجة من الطقوس اللي ماما كانت تحرص عليها مثلها مثل الفستان المنفوش بكرانيش اللي بتفصله من مجلات البوردا والمجلات الموضة بتاعة الأطفال.

رمضان بكحكه وبسكويته كوم وتيتة وماما ومقصاتهم وتفصيلهم لفساتيني كوم تاني. لو العيد تلات أيام يبقى كل يوم فستان والوقفة بيجامة أو جلابية أو لبس للبيت خفيف إما برضو بيفصلوه وإما بيبقى جاهز.

أما البالونة فدا عشقي وحبي الخاص. يمكن عيد الميلاد اللي بيجيب بلالين بتبقى بلالينه لها مذاق مختلف عن بلالين العيد. ياااااااه كنت بنتظر بشوق تيجي عربيات خالاتي وتزمر من تحت البيت وأحس بجد إن العيد وصل لما ييجوا ولاد خالاتي ونلعب سوا وأحس بأجمل دفا في الدنيا. وكل بنوتة صغننة تتباهى بفستانها والأمهات تتكلم عن الفساتين جابوها منين أو عملوها إزاي وخلصوا في وقت ييجي كدة كام يوم أو كام ساعة من التفصيل. طب واتكلف كام أو اشترتيه من محل إيه؟؟؟

الفرحة كمان كانت في العيدية اللي بتبقى دايمًا فلوس جديدة لانج: عشرة جنيه دي أقل حاجة ولما كبرنا شوية بقوا عشرين. بعد العيدية اللي بنديها كلها لماما تشيلها ناخد جزء وننزل الغورية ونتمشى نتفرج على المحلات ونشتري لعب وآيس كريم وبالونات وعرايس ونجيب لبعض الهدايا. وساعات نجيب توك شعر وغوايش بلاستيك جميلة بألوان حلوة.

لما كنا بنلعب كنا بنلف نلف نلف بالفساتين وطبعًا الفستان تحته جيبونات كتيييييييييييير خالص عشان يبقى منفوش منفوش منفوش قوي. فساتيني كانت أكتر فساتين منفوشة وكل ما يكش الفستان أتمنى أصغر عشان ألبسه تاني ولا يصغرش عليَّ.

-لو ما كلتش/ كلتيش مفيش خروج
-حاضر يا ماما

-ولد
-نعم

-بنت

-نعم
-ملكوش خروج قبل ما تكملوا الاطباق شوفوا فلان ولا فلانة خلصوا الطبق قوام وعشان كدة نازلين وأنتو بقى ملكوش نزول النهاردة معاهم

طب خلاص هناكل أهو قوام

هو دا الحوار المعتاد بينا وبينهم كلهم

-يا غتت آآآآآآآآآآآآآآآآآآآآآآ يا بابا طرقع لي بالونتي
-تيجوا ننزل نفرقع بمب؟

- لأ أنا ما بحبش البمب
- خلاص خليكو أنتو هنا واحنا هننزل نفرقع البمب

ولما كبرنا شوية

-البنات يلعبوا مع البنات والصبيان مع الصبيان

كبرنا أكتر

-ياللا يا بنات ننزل نولع الكاسيت و نديها رقص(كلام البنات)

-ما تيجوا ننزل نلعب ماتش كورة في .... ولا أقولكم تعالوا نخرج شوية نتمشى أو نروح أي حتة(كلام الصبيان)

آخر اليوم

يا خسارة العيد خلص قوام

تاني يوم

خروج عند عمتو دي وعمتو دي وعمو دا وعمو دا ونرجع بعد نص الليل بعد ما نكون نمنا في العربية وبابا يشيل كالعادة بعد ما يركن في الجراج.

وكل سنة وأنتم طيبين