بتصعب عليَّ نفسي

بتصعب عليَّ نفسي قوي. وألاقي دموعي نزلت بسرعة لما أفتكر أي حاجة حلوة صغيرة عدت أو حتى حاجة كبيرة. المهم إني بحاول آخد نفسي في أي حاجة تانية وأملا دموعي في كوباية يمكن أشربها لما ما الاقيش ميه تروي عطشي في يوم. بس بقول لنفسي: ياااااااااااه هو ليه الواحد عنده إحساس بالكلمة كدة؟ ليه الواحد بينزل دموع على حاجة ممكن تكون أتفه ما تكون لشخص تاني لدرجة إنه ممكن ياخد الكوباية اللي بملاها دي ويدلقها ويمشي عليها بحذاء أسود لامع بلون قلبه أو لون شعره أو لون بدلته اللامعة في ضوء الشمس أو بين أضواء الكشافات اللي فولتها أعلى كتير من أضواء قلبي لما بيرقص بالفرحة من كلمة حلوة أو حاجة حلوة صغيرة ممكن تفرحه وتزيد من دوسة نفس الحذاء عليها علشان تكسرها وتحطمها زي ما نفس دوسة الحذاء بتشخلل قلبي برضو لو مشيت من طريق فيه شجر كتير ورقه اصفرّ وأصبح هش وداني حابة تسمع صوت هشاشته تحت رجلي.
بتصعب عليَّ نفسي لما ألاقيني مش قادرة أميِّز إن كان اللي بيني وبين قلب اللي حواليا حب ولا خداع..وبتصعب عليَّ نفسي أكتر لما ما الاقيش جواب يطمني عن السؤال!!
بتصعب عليَّ نفسي لما ألاقي إني بفكَّر حلو في حاجات أحلى لناس ما تستاهلش، وبتصعب عليَّ نفسي أكتر لما بلاقيني بكدِّب نفسي وأجني عليها زي العادة واقول إني ظالمة الناس كلها حتى لو كان الناس كلها بتيجي عليَّ كتير.
بتصعب عليَّ نفسي لما أتخيَّل إن كلامي تحصيل حاصل ضرب الثانية اللي بعيشها من عمري اللي فات واللي جاي على الأمل أو تحصيل حاصل ضرب ساعات السعادة × عداد العمر اللي ولَّى وفات.
بتصعب عليَّ نفسي لما بفكَّر في الغاليين على قلبي وهما بينسوه وبينسوني.
صعبان عليَّ نفسي بس الأكيد إني كالعادة هواسيها لوحدي برضو بنفسي ومش هستنى حد يواسيها غير ربي لأنه أرحم عليَّ منك يا نفسي.