بتخيله

بتخيله قاعد في وسط هدومه وشه في الأرض ومكسوف وبيتكلم.

بتخيلني داخلة عليه وعلى والدته بصينية عليها حاجات تقيلة.

يمكن تكون الصينية مش شايلة حاجات كتير بس مش عارفة ليه في اللحظة دي بحس إنها تقيلة خالص وفيها حاجات كتير عليَّ أشيلها.

وأول ما أدخل يشيل عينيه من الأرض ويبص في عيني كأنه بيقول لي بيهم: خلاص كلها حاجات بسيطة وهنكون لبعض..

وأول ما تقع عينه عليَّ أتلخبط خالص وأوقع الصينية بكل اللي فيها عليه وعلى والدته ووالده وكل الموجودين يتلخبطوا ويحاولوا يصلحوا الموقف.

وانا من لخمتي أدخل أوضتي جري وأنا مرتبكة جدًا ومش عارفة أنا عملت إيه!

ومامته تبص له بصة كدة من تحت لتحت وتبقى عاوزة تاكله بيها قال إيه بتقول له بينها وبين نفسها: إيه البنت الخيبانة دي اللي مش عارفة تشيل الصينية وجايبني من بيتنا أخطبها لك؟

على فكرة دا مش فيلم .. ولا مقطع من فيلم أساسًا.

دي حقيقة أنا من زماااااااااان خايفة منها. إني أوقع الصينية من لخبطتي على العريس ومامته وباباه..

ههههههههه

مش هتيجي بقى علشان أكب عليك اللي على الصينية؟؟