مستنياك

بلهف الأحبة مستنياك..

مش هنزل زي بنات كتيرة معاك.. بس هستنى ترجع لي بالنصر والعزة.. هستنى ترجع لي راكع وساجد بين أيادي الله بعزة وانتَ منتصر على نفسك قبل ما تنتصر على الظلم والاستبداد..

ما تقولش عليَّ بتقاعس عن أداء الواجب عشان أنا عارفة طول عمري إنك عارفني كويس بنت بمليون راجل بس عشان أحفظ نفسي وأحفظ أي غالي ساعة الخطر.. لكن خد بالك انتَ كل الرجالة كلهم اللي بنتظر أرجل واحد فيهم..

صحيح وبالحق أنا قوية بس انتَ أقوى مني كتير عشان دي مهمتك تبقى أقوى وأعلى وأرجل مني..

هستناك هنا زي القوارير ما تستنى حد يرجع لها وياخد عطرها من جواها ويتعطر بيه..

هستناك ومش هنزل لأنك لسه ما بقتش ليَّ حاجة وهستنى تكون لي أحلى حاجة وانا أكون لك أحلى من أحلى حاجة..

هو الصياد لما بيروح البحر، ولا الفلاح لما بيروح الحقل، ولا الحاج لما بيروح الحرم بياخد معاه حد إلا لما يكون حتة منه؟؟؟

وانا مستنية أكون حتة منك وانتَ راجع بطل..

صحيح كنت بكلمك عن القوة والعزة والثأر والكرامة عشان أستثيرك ضد الظلم والظالمين، لكن ما تنساش إني برضو مش هوزع الأدوار وتاخد انتَ زي دوري وبرضو لأني أقل منك في الجهاد: انتَ هتنزل تجاهد بنفسك .. وانا برضو هستنى ترجع لي.. هستنى إني أبقى أحلى دنيا ليك لما نتكافئ بعشرة من الولاد أجيبهم يبقوا كلهم في صورتك، شبهك تمام رجالة وأرجل منهم ما شافتهم مصر..

هما دول تاج العزة والشرف لنا اللي هيكونوا أحلى هدية مني لك ومنك ليَّ لما برضو تثبت لي إنك أعظم مجاهد يستحق أعظم زوجة في الوجود.. مش غرور مني إلا بيك.. يعني يصح أعظم مجاهد ياخد أي زوجة وخلاص؟!

بس برضو هستناك، ومش هنزل وراك..

مهما تلومني كل البنات .. أنا مش أد لومهن غير إني برضو مش عايزة أشترك معاك في حاجة تنقص ولو قدر بسيط من رجوعك لوحدك بالنصر ليَّ، ورجولتك ضد العدو الصغير والعدو الكبير اللي هو: نفسك.

طب لو نزلت الميدان أطهَّر جراح غيرك، وأداوي ناس غيرك، وأواسي ناس غيرك.. تفتكر هيكون لك إيه فيَّ، وهواسي وأداوي وأطهَّر جراحك إزاي؟ ما هو لازم أكون لك وتكون لي بس بعد ما ترجع لي بالنصر لوحدك..

هسنتاك وهدعي، واصوم، واقوم وقلبي معاك وربي حارسك عشان انتَ عمرك ما حسيت الذل غير بين إيديه..

ويا ريت الجبين اللي اتمرغ في التراب يسجد له يرجع أعلى وأعلى من أي جبين..

هو دا انتصارك وهو دا اللي بستناه منك.

وتاني إوعى تقول عليَّ جبانة أو بُق ع الفاضي..

بس افتكر إني عايزاك تعود لي ومش مهم تكون سليم، بس الأهم تكون مرفوع الراس..

خيال بسيط لحلم كبير رسمته بيني وبين واحد في علم الغيب هيكون أحلى فارس في أحلامي بعد انتصاره على العدو مش على ابن الوطن الجريح الأجير..

والخيال ما فيش عليه قيود ..