نفسي في طبق قمر الدين عليه عين جمل وبندق وزبيب من إيدك يا تيتة

بجد وحشتني أطباق تيتة الزجاج أو الصيني الواسعة الكبيرة، وحرصها على تلميعهم وتنشيفهم ورصهم في البوفيه بمنتهى العناية حتى لا ينكسروا لأنهم من (جهاز تيتة وهي عروسة).

فاكرة كمان الطبق اللي كان صعبان على تيتة لأنه كان غالي وفخم جدًا ولما انكسر نصين وشافته تيتة أم كريمة رحمها الله أخدته من تيتة عشان تروح بيه وتلحمه على طول قبل ما ينكسر بزيادة.

زبيب تيتة اللي بترصه على الأطباق له طعم مختلف تمامًا، وكمان جوز الهند اللي كنت مش بحبه، وعشان كدة تيتة كانت بتعمل لي كذا طبق مش مرشوشين بجوز الهند.

كالعادة لازم كل البيت بجيرانه يدوق من أطباق قمر الدين بتاعتها. دا زي الرز باللبن والعاشورة وكل الحاجات الحلوة الجميلة والأكلات اللي عمر ما حد من بنات تيتة أتقنها بدرجة إتقانها هي نفسها.

إحنا في آخر رمضان وكان زمانها بتتكلم مع ماما وبتتفق على الخميرة والدقيق وريحة الكحك. ياااااااااااااه أنتِ وحشاني قوي بزيادة يا تيتة. مش عارفة ليه مش عايزة أروح المصيف السنة دي لأني كل مصيف بفتكرك لما كنتِ بتلعبي معايا الكوتشينة والدومينو وتقفي لي في البلكونة تتفرجي عليّ وأنا بلعب بالعجلة في الشارع وتنادي عليّ بأعلى صوتك كل ما أقرب من العربيات في الشارع. فاكرة يا تيتة ولا نسيتِ؟؟ لا أنا عارفة لا يمكن تنسي ولا يمكن أنسى أطباق قمر الدين اللي حلاوتها في بقي لسه بتفكرني بأحلى أيامي.
بوسة كبيرة على أحلى خد.