فانوس بشمعة,......و إيه الجديد؟؟

الفانوس بتاعي ده أبو شمعة منورة... أيوة هو أبو شمعة منورة...أنا و حسن و طارق و عبد الحميد و نورا ما كبرت شوية و هبة و نهى الصغننة و كلهم كلهم...كل عيال العيلة بتلعب بالفانوس اللي يح يح يح بيلسوع في الإيدين... و نجري على مكنة خياطة تيتة و نشب عشان نطلب منها و هي قاعدة تفصل لنا فساتين العيد حتة قصقوصة عشان نربطها و نعملها إيد للفانوس.

ع البسطة الجميلة ربطنا كل الفوانيس بالقصاقيص القماش اللي هي من فساتين العيد بتاعتنا و نزلنا عند الجيران على السلالم نقول: وحوي يا وحوي إياحا و حاللو يا حاللو مرضان كريم يا حاللو
معلش...أصل رمضان بتاعنا إحنا كان على أيامنا اسمه: مرضان بتاع الأطفال الصغننين اللي ما بيعرفوش غير حاللو يا حاللو
جدو قبل ما يموت كان لازم ينزل بنفسه كل سنة و يجيب لنا فوانيس جميلة بشمعة... على فكرة برضو كان في فوانيس بلاستيك، بس مليش دعوة يا جدو أنا عايزة الفانوس دا...هيه

أجمل حاجة لما كان جدو بيشييييييييييييييييل حسن و يصلي بيه و هو على كتافه

أنا كمان كنت بستناه يسجد عشان أرمي نفسي على كتافه، أصلك طويل أوي يا جدو هطول بس كتافك إزاي؟ أنتَ كتافك يا جدو أطول مني أنا نفسي.

تيتة بتجري ورايا و ماما بالمازورة و المقص.... تيتة تقول لي: تعالي بس هنا... و أنا عايزة ألعب يا تيتة الفانوس بينادي و حاللو يا حاللو عايزاني أقولها.

أجمل حاجة لما بابا كان مش بيرضى نطلع لجدو نفطر معاه... نستنى لما جدو ينادي بصوته العالي اللي بابا عمره ما يقدر يقول له: لأ أبدًا.. و نطلع.
جدو قاعد جنب الباب كالعادة و مستني نطلع.. أنا بطلع و برمي نفسي في حضنه.
حسن بيوشوشه و بياخد مصروفه اليومي منه: جنيه بحاله و كمان حق الوشوشة: ربع جنيه كمان
جدو بقى بيديني جنيه و يقول لي: و أنتِ مش عايزة حق الوشوشة؟
تعالي يا قنوعة أنتِ يا غلبانة.. و أفضل في حجره الجمييييييييييييل أوي.
جدو مشي بسرعة و سابنا لرمضان.

و سابنا للفانوس الملسوع اللي حسيت من بعده إنه ما لهوش طعم الإزاز الملون و الشمعة المنورة اللي بتلسوع الإيدين و بتبكي على سنين عمرنا اللي فاتوا بسرعة.

الله يرحمك يا جدو
الله يرحمك يا تيتة