صباح الرز باللبن اللي بيخلي سنتنا البيضا تيجي بسرعة
صباح العسل الأبيض و اللبن الحليب
لما بنساكِ بتجيني تمللي ف أحلامي
و ازاي أنساكِ يا خفيفة الروح
يا جميلة الهلة و الطلة
تعرفي مين شفت؟
شفته كمان بقميصه الكحلي
كان أوسم و أوسم من كل مرة
بنطلونه الرمادي المكوي و حزامه و جزمته
شعره المتسرح
كله بتفاصيله الحلوة أوي
فاكرة لما كنتِ بتقولي إنه راح المسرحية دي؟
أنا بقى شفته خارج منها
كان زي القمر
يمكن هو كمان بيوحشني
بتوحشني كتافه الجميلة لما كان بيصلي و ياخدنا عليها
بتوحشني كمان يا تيتة ستايرك البيضا
و كراسي صالونك
و البيوت الجميلة اللي كنا بنعملها بستايرك
و وحشني صراخك و احنا بنلعب بالمية
و السكر
ولا هتنسي؟
أبدًا عمرك ما نسيتِ
و لا أبدًا تنسي
و هتنسيني إزاي؟
في حد بينسى نفسه..روحه؟
و لا عمري هنسى
و لا عمرك أبدًا تنسيني يا أجمل بسمة كانت بترسمني
...
و كبرت كتير أوي يا تيتة
كان نفسي تشوفي و تفرحي بيَّ و أنا بكبر قدام عينك
و لا يهمك
أنا حاسة بكل أنفاسك جنبي بتونسني
و لا يوم هنساها و لا هنسى أبدًا عينك
و لا هنسى إنك دايمًا معايا في كل حاجة بتونسي وحدتي
ليست هناك تعليقات:
إرسال تعليق
أشكر لك المتابعة والتفاعل بالتعليق