كان فيه تقويم هجري
أيامه بتعدي
مكتوبة باقلامي
كان كل ما أنسى أحطه يسبقني قلم أستاذي الأحمر
يكتب لي علامة استفهام
...
فات كام من أيامي
عربي
و ميلادي
و ميلادي كان ييجي
بيعدي عليَّ في كل سنين عمري مرات مرات
كنت بشوفه مخطوط في العمر عشر مرات
كان بين كل مرة و مرة أيام بتعدي
حلوة
مرة
بس المرسوم
كان على كراستي
في صفحة درسي
...
في النص كتبت العنوان
قلمي الأحمر عمره ما كتبه
و ده علشان
مبحبش أكتب عنواني أبدًا بالأحمر
...
ع السطر وازيت بين العنوان و تاريخي هجري و ميلادي
كانت أيامي الحلوة بتتلاقى
يوم لما يهل هلال شهري العربي
كنت بحسه
كان بيمس في قلبي ساعاته
كنا في الفصل نقول يا بنات
أهو عدى جماد
من بكرة نصوم غرة رجب
و ف ليلة سبعة و عشرين
كنا احنا بنات الفصل
زي القمرات
زي أهلة
بتمر الشهر وراه الشهر
نعمل حفلة
نرسم فيها بكلمات أستاذنا
ليلة الإسراء
...
و الندوة تيجي ورا الندوة
نتجمع كلنا نتلاقى
نحسب باليوم
بكرة بعده هييجي شعبان
آااه من شعبان
دي الليلة صيام فيه دعواتي
و أمنياتي
محفورة بذكرى حلوة جميلة
ليلة ما بنجمع العيلة
ع الأرض نمد ورق الجرانين
نعزم في اليوم كل العيلة و عيلة العيلة
....
و تعدي ايامي ف كراستي
أرجع فصلي
أكتب بالقلم الجاف
تاريخين
واحد كان هجري
و التاني ميلادي
و الليلة يا ولاد هنصوم اتنين و خميس
و لحد النص هنتوقف
...لأ ليلة الشك هنتوقف
الليلة صيام
...
رمضان قبل اما يهل هلاله
كنت بحسه
من صوت فوانيسنا المضوية
من فرحة كنت بشوفها على جبينك مستنية
كل اما تطلي من ورا شباكك
أجري و اطلع في عيونك
ألاقيهم ارتسموا بفرحة
رمضان كان بيهل عليَّ علشانك
...
أرجع من تاني لكراستي
أكتب شوال من بعده
يخلص شوال
ييجي وراه ذو القعدة
بعده ييجي ذو الحجة
و تاريخي زي ما هو مكتوب
على سطر جميل
على كل أوراقي ف كراستي
...
و نصوم يا ولاد
وقفة عرفات
...
ييجي من بعده تاني محرم
و نصوم التاسع و العاشر
الله على تيتة بحلتها
واقفة بالحلة في مطبخها
بترص اطباق
بتقولي يا بنتي ناوليني
أناولها
و بتوعدني
لفيوم فرحي
هترخ المطرة فوق راسي
علشان من خيبتي
بلحس مغرفة الحلة
...
على كل بيبان عمارتنا
واقفة بخبط
تفتح لي وشوش
أحلف مش هيَّ
بتاعة اليوم
و لا يوم هتكون
أناولهم اطباق الفرحة
على وش اطباقهم رصيتهم
جوز هند ، زبيب
الله على تيتة و رصيتها
...
مكنتش أعرف
يوم ما هبطل أكتب
على ورقي ف كراستي تاريخيني هجري و ميلادي
هتوقف فرحة عمري لما تسيب بيتها
...
الوقت اليوم بيعدي
أطباق اليوم غيرها امبارح
و تاريخ اليوم غيره كمان
ما هي زي ما مشيت
مشيت كل ساعات الفرحة
مشيت كل ايام البسمة
مشيت حتى من كراريسي
تواريخ على أوراقها
كانت... هنا هجري...
هنا ميلادي
رائع بوحك يحملنا على اجنحة الدهشة الى روعة الماضى..مودتى
ردحذفمن يوم ما بطلنا نكتب تاريخ هجري وميلادي بطلت حاجات كتير حلوة تحصل في حياتنا !!
ردحذفكلمات دافية بس مرة ومؤلمة
يا صباح الحنين
...
صدقيني لو أقول لك بفرح بكل تعليق لكِ هنا. وأتمنى تعليقاتك لا تتوقف كلما رأيتِ من جديد تضيفينه على قراءتك لما كتبت. حتى لو توقفت يداي عن الكتابة أرجو ألا تتوقف يداكِ عن التعليق.
حذفرااااااااااائع تسلم ايدك
ردحذفرااااااااااااااائع تسلم ايدك
ردحذف(هبة النيل محمود )