ليلة القبض على الفرخة

إهداء إلى الأستاذ طارق رمضان من المغامير

أفتكر لك إيه يا بامية و أنتِ كل لحمة بدِمعة؟

.........لمَّا دار الدور عليهم

جت حكومة و احنا منهم

فتشت كل البيوت

فوق سطوحنا الناس تداري

اللي بايع و اللي شاري

كله خاف م الدور يموت

في السطوح نسوان تعدي

ناس بتجري .. ناس تهدي

و احنا مش عارفين نفوت

ربَّا خوفنا للغلابة

م التعالب و الديابة

م الوحوش و من الأسود

عدى يوم و اتنين علينا
خدوا من قدام عنينا
كل ما كان لينا قوت

عشتي و عشة جيراني
مش هتشوفها عينا تاني
و احنا مالنا غير سكوت