لكل من علمني حرفاً

1

من أول الحضانة و لحد الجامعة و بعدها كمان

الناس دي لهم أفضال كتيرة علي و مستحيل أبدا أنساهم

البداية

مدرسة إيجيبت الخاصة المشتركة(13 حارة باب المنشر حسن الأكبر-القاهرة) 1985

الحضانة: ميس منى رياض، و ميس مرفت في الروضة

سنة أولى ابتدائي:ميس صفاء و ميس منى عزيز(ميس صفاء كانت بتدينا إنجليزي و ميس منى كانت بتدينا العربي و كنت بمووووووووووت فيهم و كانوا سمار و حلاوة).!؟

سنة تانية برضو نفس الناس

سنة تالتة ابتدائي:ميس هناء في الحساب و ميس منى برضو في العربي و ميس صفاء في الإنجليزي بس ميس منى اتغيرت و جاتلنا ميس تانية جميلة خالص لسه فاكرة كتابتها للتاء المربوطة ع السبورة كان خطها حلو زي شكلها الجميل و كمان مكانتش بتضربنا كتير و كانت بتحبنا أوي و كانت كمان محجبة هكلمكم عنها في ذكرى خاصة

سنة رابعة ابتدائي:مستر محمد عطوة......كلاكيت أول ظهور له في حياتنا الدراسية الجميلة و كمان مستر مجدي اللي راح الجيش و كان بيشجعنا و يعملنا جزء في الحصة لنتعلم كتابة الخط الإنجليزي بالمشبك أما العلوم فبوسة كبيرة لميس غادة اللي كانت بتشجعني كتيييييييييير أوي في فصلي رابعة أول اللي كان فصل المتفوقين و كان في موقف أحبه جدا لها و أذكره كمان و عمري ما أنساه: كانت ميس غادة حبيبتي رائدة الفصل و كانت طلبت من كل واحدة و واحد في الفصل عمل لوحات عشان نزين بيها الفصل و كان جدو لسه ميت و كنت بحب الرسم جدا و ماما دايما و بابا كانوا بيشجعوني بس ماما أكتر.........و ساعة ما كان الناس بيعزونا كنت قاعدة في الأوضة برسم جهاز القلب و الشريان الأورطي و البطين و الأذين و كله عملته بإيديه و بعدين دخلت علي سماح و هي بنت خال ماما و شافتني برسم و انبهرت جدا بالرسمة و كل اللي كانوا في العزاء دخلوا يشوفوا الرسمة اللي رسمتها و فاكراها و أنا برسمها حتة حتةتاني يوم رحت الفصل و كنت فرحانة و طايرة من تشجيع الناس لي و كمان كنت متيلة صاحباتي و صحابي في الفصل هيحبوا الرسمة جدا بس يا خسارة العكس حصل عارفين ليه؟؟؟أصل ولاء محمود سامي صاحبتي اللي كانت قاعدة ورا في الصف اللي في النص كانت ودت اللوحة بتاعة القلب تترسم عند الخطاط و طبعا الخطاط عملها أحلى لأنه متخصص و راجل كبير و في الوقت نفسه رسمها كقلب من اللي بنرسمه ع الكراريس و ع الهدايا و كان شكله قلب جميل جدا، لما ميس غادة دخلت الفصل لقيتني زعلانة عشان البنات و الولاد في الفصل كانوا مصرين يعلقوا رسمة ولاء محمود سامي و رسمتي أنا لأ. فلما شافت الميس غادة رسمتي و سألتني مين اللي رسمها و قلت لها أنا فرحت جدا و قالت لي هنعلق الاتنين. لما جت موجهة العلوم و شافت الرسمتين ع الحيطة في الفصل قالت الرسمة دي مش مظبوطة لأنها شبه القلب اللي بنرسمه نزين بيه لكن مش زي القلب اللي في جسمنا أما الرسمة الصح هي التانية و كنت في منتهى السعادة ساعتها و خصوصا إن كمان بعدها رسمتي فضلت ع الحيطة أطول وقت من رسمة ولاء اللي وقعت بعدها على طول مستر محمد عطوة ده كان راجل مش ممكن الواحد ينساه كان بيشجعني كتير أقرا و أروح دار الكتب في باب الخلق اللي في الطريق بين المدرسة و البيت.و كنت دايما بدخل المكتبة بتاعة الطفل و في إيدي طارق و حسن و عبد الحميد و الجيران و ناس تانية و كان في الوقت اللي افتتحوا مهرجان القراءة للجميع كل ولاد العيلة و جيران البيت بتمسك إيدي و نروح سوا مع بعض دار الكتب. أما الحساب فكان أستاذ محمد بيرم اللي كان خطه أجمل خط في المدرسة و مش ممكن عمري هنسى خطه الجميل.الراجل ده ياما كتب لنا امتحاناتنا اللي ماكانتش بتتكتب ع الكمبيوتر لأن مكانش فيه كمبيوتر وقتها.أما قبل ما أسيب المرحلة دي لازم أرجع شوية لورا سنتين عشان أفتكر موقف جميل لأستاذي الأجمل: مستر مهدي مدرس الإنجليزي في الوقت اللي كان مش بيدرس لنا إنجليزي لكن كان بيدرس لأخويا و كنت بحب جدا أزور أخويا في الفصل بتاعه، في يوم طلعت الفصل بتاع أخويا و زي ما كنت بشوف كل أب و أم بيروحوا يسألوا عن ولادهم في المدرسة، رحت أسأل عن حسن في الفصل.خبطت ع الباب،فتح مستر مهدي، و عشان كان طويل بص فوق و بعدين بص علي تحت فلقاني و قال لي نعم،مفيش طباشير. قلت له لأ أنا جاية أسأل عن حسن هوة عامل إيه مع حضرتك يعني كويس و لا لأ؟ مستر مهدي سخسخ على روحه من الضحك و قال لي: هوة أنتي مامته و لا مين؟قلت له لأ أنا أخته. فقال لي: و في سنة كام؟ قلت له: في تانية أول. فقال لي: أنتي في تانية ابتدائي و هوة في رابعة و بتسألي عليه؟ هوة مين اللي يسأل عن مين؟؟؟؟ و قعد يضحك و ضحك كل اللي في الفصل. بس حسن كان متضايق شوية لأنه مبيحبش و لحد دلوقتي إني أبقى وصية عليه في تصرفاته........و من بعدها كنت بروح لحسن الفصل في الحصة الأخيرة و كنت بقعد مع مستر مهدي في حصة الإنجليزي في الوقت اللي كان مستر مهدي بيسأل الفصل كله عن حاجة في الإنجليزي و محدش يعرفها كنت الحمد لله بجاوب عليها و ساعتها يقول: البنت اللي أصغر منكم جاوبت و أنتم قاعدين؟؟؟؟


2

و أفتكر في تالتة ابتدائي مستر مهدي كان بيدرس لنا الإنجليزي و افتكرني من أول يوم لما دخل الفصل و قال لي مش أنتي اللي كان أخوكي عندي السنة اللي فاتت؟قلت له: أيوة يا مستر.فسرح و ضحك ضحكة عالية و قال لي فكريني باسمك.قلت له:رانيا. فضحك و قال أيوة أيوة افتكرت.و من يومها و أنا بحب الإنجليزي أضعاف ما كنت بحبه قبل ما يديني مستر مهدي.مستر مهدي كمان كان بيشجعنا كلنا.اللي كان بيجيب أربعين من أربعين كان بيقف ع الفصل لحد لما ييجي مستر مهدي.و كنت دايما بجيب أربعين من أربعين و لو خستكت مرة و جبت تسعة و تلاتين فكان برضو بيوقفني ع الفصل.كان دايما اللي بيجيبوا 40 من 40 هما: أسماء مصطفى سيد.سامر صالح عبد النعيم.أحمد عبد العزيز محمد.علي محمد إمام.رانيا إبراهيم.يسرا مصطفى سيد مصطفى. رشا رمضان كل واحد كان متخصص في يوم و كنا بنكتب أسامي اللي يتكلم ع السبورة و لما المستر يدخل يشوفهم و يضربهم.بس غالبا كنا بنمسح الأسامي عشان نكسب صحابنا.في مرة من المرات عملت عملة سودة:كتبت ع السبورة بألوان شمع و كنت معتقدة إنها طباشير ملون و ممكن تكون زي الطباشير الملون، و لما جه مستر مهدي يكتب ع السبورة الطباشير مكتبش عشان المادة الشمعية و قال اللي عمل كدة يقوم يقف.مستر مهدي كنت بحبه بس إنه يضربني كان حاجة وحشة جدا و بالأخص إني مش مضايقني الضرب بقدر ما كان يهمني ما انضربش و أنا متفوقة دايما ع الفصل و كمان إزاي يضربني و أنا بحب الإنجليزي و بحبه و بحب حصته كمان و كمان الموقف بتاع أخويا كل ده كان بيدور في بالي بس برضو ضربني. الغلطان لازم يتعاقب.ز في سنة خامسة كانت ميس بدرية بتاعة الحساب و ميس هويدا بتاعة العربي و ميس نبوية بتاعة العلوم و ميس نبوية دي بقت مرات مستر سعيد مدرس الإنجليزي بعد كدة و كمان مستر سعيد طلع في برنامج كلام من دهب بعدها بكام سنة بس سأله طارق علام مين مكتشف الدورة الدموية في جسم الإنسان فنسي و قال ابن الهيثم و هوة ابن النفيس و حسن ساعتها و هوة بيتفرج معايا على كلام من دهب قال لي: لو كانت ميس نبوية معاه في البيت دلوقتي كانت جاوبت ع السؤال و كسبت الجنيه الدهب أما بقى ميس هويدا كانت معرفش ليه بتكرهني كدة لله في لله. الله يسامحها و كانت بتقعد تقول علي تخينة.ربنا يسامحها.و ميس بدرية كانت ممتازة في الحساب بس أنا كنت مبحبش مسائل النسبة و التناسب و خصوصا المسائل الكلامية كنت بكرهها جدا. أما في سنة أولى إعدادي فدخلت أولى تالت و كان فصل المتوسطين عشان كنت جايبة في خمسة ابتدائي 85 في المية بس و بعدين دخل أستاذ صبري بدران أحمد البسيوني مدير المدرسة و قال كل الفصول تمتحن في اللغة العربية و لما امتحنت نقلوني في فصل أولى رابع و كان هناك أستاذ أسطورة العربي أستاذ عاطف حسين و كنت كتير بسمع عنه و كل الفصول كانوا بيحبوه جدا بس أنا برضو كنت بحب مستر محمد عطوة و دة لأنه كان بيدرس لي كمان في 4 ابتدائي. دخلت على فصل أولى رابع و كان بالنسبة لي غريب شوية. صحيح البنات هما هما:يسرا و إيمان محمدد نزار و أسماء مصطفى سيد و رشا رمضان و كلهم كلهم. لكن الواحد كان خد على فصل أولى تالت و داليا و ياسمين عباس عزت و نهى علي عويس و نادية صبحي جاد و كل الناس الحلوة دي.بعدين في الفسحة كنت بروح أولى تالت و كنت بقعد معاهم و كانوا بيسألوني خلاص هنساهم بأى و مفتكرهمش ماهو أنا اتنقلت فصل المتفوقين فكدة هبقى مغرورة و هنساهم، لكن أنا كنت بأكدلهم إني عمري ما هنساهم أبدا و دايما هجيلهم في الفسحة في أقرب فرصة رجعت تاني لفصلي القديم فصل أولى تالت مش بس عشان الكراريس و الكشاكيل، لكن عشان حسيت بالوحشة.في الوقت ده رجعت بنت تانية معايا و البنت دي كانت نانسي.و الفصل كله قال عنها إنها رجعت عشان تبقى أشطر واحدة في فصل المتوسطين. بس على مين كنت دايما بنافسها.مستر مجدي سعد: مدرس الإنجليزي ساعتها ياااااااااااااااااااه كان بيشجعني كتير و أفتكر لما قال لي: درو أ تشير أو ارسمي كرسي و رسمته ع السبورة و خللى الفصل كله يصقف لي عشان الرسمة كانت حلوة أوي مستر مجدي سعد كان من قمم مدرسة إيجبت الخاصة مع باقي أطراف المثلث أو دفعته: مستر مصطفى بتاع الرياضيات و مستر هشام بتاع اللغة العربية. في الوقت ده كان بيدينا مستر أحمد عبد العزيز الرياضيات و كان ساعتها أحداث الزلزال و بعدها بشوية كانت الإنتخابات الرئاسية و لأول مرة أسمع الحكاية دي و لما سألنا مستر أحمد واحد واحد هتنتخبوا مين : أنا الوحيدة اللي قلت مش هنتخب مبارك عشان أكيد لازم يكون فيه واحد تاني..............كلام عيال بقى بعدين عرفت من فصل تالتة إعدادي اللي هوة أكبر فصل في المدرسة إن حصلت خناقة كبيرة جدا جدا جدا بين مستر أحمد عبد العزيز و مستر مجدي سعد لما مستر أحمد عبد العزيز كان بيدي رياضة في فصل تالتة إعدادي و بعدين جت حصة مستر مجدي و مستر أحمد أصر لازم الناس تنقل المسائل من على السبورة فلما مستر مجدي خبط على كتف مستر أحمد بالعصايا عشان يمشي قامت الخناقة بينهم و البنات صوتت و الولاد طلعوا يجروا على مشرفين الدور إنهم يلحقوا مستر أحمد و مستر مجدي سعد و هما بيتخانقوا




ميس إلهام
مقدرش أفوت اللي حصل لي النهاردة عشان يا جماعة اللي بيحصل ده كتير أوي علي. النهاردة قابلت ميس إلهام حنفي اللي كانت مدرسة التاريخ لي في أولى ثانوي في فصل أولى تالت فصل الفائقات اللي كان على السلم مباشرة و جنب المكتبة في مدرسة الحوياتي الثانوية للبنات. الله عليكي يا ميس إلهام...ميس إلهام مش بس كانت مدرسة تاريخ لأ دي كانت كمان رائدة الفصل. كنت بحبها و بحبها دلوقتي أكتر زي ما بحب الماضي الجميل بذكرياته الأجمل... يااااااااااه! ربنا بيحبني أوي يا جماعة لأني بقابل الناس دي و بفتكر اللحظات الجميلة دي دلوقتي!!! المهم و الله لسه فاكرة كتاب التاريخ و اللوحات المسمارية اللي كتبوا عليها حضارة الفينيقيين.. ميس إلهام دي كانت عبقرية.. كانت لما بتشرح لنا تاريخ المصري القديم و هوة بيزرع كانت بتوطي ع الأرض و كأنها هي الفلاح المصري القديم بشادوفه و فاسه الجميل. ميس إلهام دي كانت أمنا في حصص الريادة في المدرسة...مش ممكن تتخيلوا دموعي اللي دلوقتي مغطية وشي من اللي افتكرته عن ميس إلهام و الفصل الجميل ده... فصل أولى تالت و اللي كان تالت فصل متفوقات في مدرسة الحوياتي الثانوية للبنات سنة 95 ربنا يكرمكم يا مدرسي و مدرساتي و يجزيكم عني كل كل كل الخير


3
لما مشي مستر مجدي سعد من المدرسة و خد معاه مستر هشام و مستر مصطفى اللي كان بيدخل لنا في حصص الاحتياطي و يغني لنا أغنية بسم الله و الله أكبر بسم الله بسم الله....كنت كل مرة أسمع مستر مصطفى بيغنيها بحس إني في لقطات أفلام السادس من أكتوبر و بعبر مع الجنود القنال و برفع العلم على سينا.....الله!أكتر حاجة بجد فرقت معايا مستر مصطفى اللي أغنيته دي كانت بتقشعرني لما بعيط و حتى الآن لما بفتكر نفسي و أنا قاعدة قدامه و هو بيغنيها بزعل على الأيام الحلوة اللي فاتت. كان الفراغ اللي سابه مستر مجدي في الإنجليزي كبييييييييييير.. بعد شوية دخلت لنا ميس سوسن حنفي. كانت برضو ميس شاطرة بس مستر مجدي كان أشطر منها و كفاية إنه كان بيكلمنا بالإنجليزي و بيحترم عقولنا و بيشجعنا....أما ميس سوسن فكانت أكاديمية أكتر. أحلى حاجة صحيح في ميس سوسن كانت إنها تولت فريق الإلقاء و التمثيل. كانت مخرجة عبقرية و شاطرة جداً..علمتني إزاي أخرج الحروف بشكل سليم و علمتني كمان إزاي أحس كل كلمة بتتقال و أتذوق كلمات الشعر كأني بعيش فيها....موقف مقدرش أنساه لما طلبوا ناس تشترك في السباحة و عبيت شنطتي بالمايوه و الفوطة و نسيت الصور. زعلت جداً جداً عشان مخدونيش لأن الصور كانت مهمة لاستكمال الأوراق.و قعدت طول اليوم في المدرسة من غير كتب و لا كراريس. في السنة دي كان محكم الإلقاء الفنان رشاد عثمان و كان ماسك مسرح الأطفال جه المدرسة معاه الفنان عبد الرحمن أبو زهرة و وقفت قدامهم و قلت : عندنا في البيت بطة..لم تضع للعيش خطة جسمها جسم نحيل..ريشها ريش قليل و أخدت المركز الأول في الإلقاء هذا العام و كانت مكافأتي عبارة عن شهادة استثمار بخمسة جنيه أما بقى المسرح مع ميس سوسن حنفي كان شكل تاني خالص كنت عملت معاها الأول دور كرات الدم الحمراء في مسرحة المناهج و لسه حافظة أدوار أصحابي: نهى و رشا محمد سعيد و داليا و غيرهم ما لم لا لن ليس أدوات النفي الخمسة ما صاحبت الأشرار لم يجرفني التيار لا أعبث بالأشجار ليس الجنة كالنار و كمان كان في رقصة بتعملها البنات، أما ميس الرياضة و الألعاب كانت بتدور على البنات اللي شعرها طويل عشان ا لرقصة دي، اختارتني و وقت التدريب كان هيتعارض مع وقت المسرح و عشان كدة ميس سوسن قالت لي كلمة: رانيا أنت شاطرة في الإلقاء و المسرح. و لما بتلقي كويس أو بتمثلي الناس بتفتكر دورك المميز و بتقول البنت الناجحة في الدور كذا...لكن لو رقصتي معاهم الرقصة الخليجي و نعكشتي شعرك مش هيقولوا البنت دي بترقص حلو. سيبت الرقصة على عيني عشان كانت بنات أولى رابع مشتركين فيها و أنا كنت برضو بحبهم بس معاها حق ميس سوسن. حقنة تطعيم المدرسة كانت كل سنة بيدوهالنا بتكون مشكلة البنات بتصوت و تعيط و تعمل حركات عبيطة و الولاد جامدين و زي ما الضرب للجدعان الحقنة برضو للجدعان كل الولاد كانوا بيشمروا و البنات كانت بتتدلع بس و الله ما كنت بتدلع زيهم عشان كنت بحس إن الموضوع فارغ و ميستحقش العياط و الصوات ده و كانت حجرة الحكيمة دايماً في البدرون السنين الأولى من عمرنا و بعدها كانوا عاملينها في الدور التاني مكان فصل من الفصول أما أوضة الكمبيوتر فكانت في المبنى الجديد و ميس دعاء السمرا العسولة كانت بتدينا كمبيوتر و خطبها في السنة دي أستاذ ياسر السكر. هوة كمان كان أسمر و بدقن بس كان دمه خفيف...كلنا فرحنالهم جداً. و كانوا لما بيبقى فيه حصة لميس دعاء و أستاذ ياسر فاضي كان بييجي يخبط عليها و يكلمها و إحنا كنا بنلعب ع الكمبيوتر ألعاب جميلة لحد لما يخلصوا كلام كانت كل الكمبيوترات أبلApple و اللي كان بيغيظني فيها إنها كانت تفاحة و مقطومة من ناحية اليمين نفس معمل الكمبيوتر كان أوضة التمثيل مع العلم إنه ممنوع نلمس الأجهزة بس كانت أيام جميلة أيام التمثيل كان الولاد اللي في تالتة إعدادي بيحبوا بنات عندنا في أولى إعدادي و كانوا بيستغلوا المروح قبل ما نبتدي التمثيل عشان يخرجوا معاهم يجيبوا حاجة سقعة و أكل من قدام المدرسة أنا بقى مكنش البنات دول بينزلولي من زور عشان كان عيب نعمل كدة....بس كنت بيعجبني تمثيل و أداء ولد اسمه أحمد إبراهيم. كان مع نشوى في تالتة إعدادي و كان في أولى إعدادي معانا في مسابقة الإلقاء و حتى اليوم بفتكر لما كان بيلقي درس العربي و كان بيقول: أفسحوا الطريق انتبهوا! لما كان درس العربي بيتكلم عن الحطاب الفقير اللي ماشي و قطع قميص ابن الأمير الله على الدرس ده !!! و الله على أداء أحمد كان جميل كان مع أخويا في نفس الفصل، بس كنت نفسي أخويا يبقى معايا في أي نشاط من دول بس هوة كان بيحب يلعب كورة مع العيال في الفسحة أو يشرب بيبسي أو يتنطط معاهم و يضربوا بعض. كنت بكره أنزل الفسحة عشان الصبيان لعبهم رخم. و فجأة و أنت في الفسحة تلاقي الرمل جالك على شعرك من غير مناسبة و لما تبص تلاقي ولاد بيلعبوا و بيحدفوا بعض بالرمل و المدرس معدي بالعصايا و بيضرب كل اللي ماشيين حتى لو كنت مجني عليك و محدوف على وشك و عينك و شعرك الرمل لعب عيال بقى هكمل لكم الباقي مع مدرسي و مدرساتي الجميلات مرة تانية

4
منساش وقفتك يا أستاذي الجميل في طابور المدرسة و أنت بتغني و بترج المدرسة بأغنيتك... محدش ممكن يفتكره غيرنا إحنا:تلامذة المدرسة مدرسة إيجبت الخاصة المشتركة...مدرس الموسيقى الجميل ده كان بيغني: إحنا الجيل الصاعد إحنا إحنا الجيل....تم تم تم.... و الأيام قدامنا جميلة إحنا الجيل..تم تم تم و لحد لما كان في فصل بيعمل شقاوة في حصة فاضية غاب عنها المدرس كان بيتسمع دوشتنا فيدخل علينا و يغني و نقول معاه....الله. أغانيه ترجعني تاني للكلام عن مستر عاطف حسين مدرس اللغة العربية اللي كان بيغني لنا في الرحلة: يا ملتقى الصحبة يا لا لاللي..يا وردة في الصحبة يالالالي. منورين في القعدة تمللي يا صهبجية..و إحنا نرد عليه لآخر الأغنية كان عندنا ولد اسمه محمد حسن أحمد و كان بيغني في الرحلات برضو : أنا أحط الورد على هدومي يطلع كتاكيت و فراخ رومي.أنا كداب...لا لا لا .أنا فشار...لا لا لا . و غيره و غيره كانت أيام بس مسرحيتنا صيحة الملائكة كانت جميلة جداً أفتكر منها اللي كنت بغنيه في الكورال من أغانيها: نعم نعم نحن الأطفال..شعارنا حب و جمال من أجل تحقيق الآمال..مهما نلاقي من أهوال قلوبنا نور لا نار..مثل الملائكة الأطهار و كم نعاني من أضرار..و لم يراعونا الكبار نعم نعم.نعم نعم.نعم نعم نحن الأطفال يأيها الطفل الصغير يا صاحب القلب الكبير لا تبكي بالدمع الغزير و انهض و هيا كي نطير قولوا معي الله أكبر.قولوا معي الله أكبر و يسحق الله من تجبر و يسحق الله من تجبر نعم نعم نعم نعم نعم نعم نحن الأطفال و أشعارنا كانت من تأليف أستاذنا أحمد عبد النبي ربنا يرحمه الراجل لما عرفت إنه مات بكيت عليه زي لما بكيت على ميس ناهد مدرسة الفلسفة و مستر محمود مدرس الإنجليزي الأول في ابتدائي و إعدادي و د. عيسى مرسي سليم برضو دكتور اللغة العربية بكلية الألسن و اللي مات على مكتبه في الكلية لما جاله سكتة قلبية ربنا يرحمهم يا رب كلهم كلهم نكمل كلامنا و كنا وصلنا لسنة أولى إعدادي. تانية إعدادي كنت دخلت فصل تانية رابع إعدادي و سيبت صحباتي في فصل تانية تالت و كانوا نادية صبحي جاد و ولاء و ياسمين عباس عزت و غيرهم مجموعة كبيرة. كنت عايزة أقعد قدام بس دايماً قدام كان محجوز للي ييجي أول يوم بدري. يعني أول ديسك كان فيه رانيا محمود و يسرا و التاني كان فيه رباب حسين و خلود كمال و بعدين إيمان محمد نزار و هبة محمود حلمي و إيمان سعيد حافظ و أسماء مصطفى و رشا رمضان و فيروز عبد السلام في الآخر و معاها سارة علي عبد الفتاح و إيمان عبد الله كنت فرحانة جداً بآخر ديسك في صف الصبيان مع إني كنت في الديسك الرابع أو الخامس من صف الصبيان بس تراجعت للخلف ديسكين خصوصاً لما جه أحمد عبد العزيز و علي محمد إمام و قعدوا في الديسك بتاعي كنت أنا و أحمد عبد العزيز زي ناقر و نقير. بس و الله كنا إخوات مع بعض. كنا بنسلف بعض أدواتنا و نستلفهم من بعض و كمان علي محمد إمام اللي كان أول الفصل و الطالب المتفوق دايماً على طول الخط أما المدرسين فكان من بينهم أستاذ رياض و له نوادر معانا عشان أستاذ رياض كان ألدغ في حرف السين و كنا في يوم بنتمللى و بيقول لنا نص فيه كلمتين: أثاث و أساس و الغريبة إن حتى السياق بتاع الكلام كان ينفع فيه ده و ده و يومها فصل المتفوقين تانية رابع كان كله جايب تمانية من عشرة في الإملاء و هي فضيحة بس فضيحة لذيذة تجنن عشان إحنا و إحنا بنتمللى كنا عايزين نقول له يا أستاذ مين اللي بالسين و مين اللي بالثاء لكننا كنا خايفين نجرح شعوره و خصوصاً إن السياق كان برضو ينفع نحط ده مكان ده و ده مكان ده لكن العبرة في النهاية بدفتر تحضير الأستاذ رياض أستاذ رياض كان له فضل تاني علينا: و هو مكتبة الفصل و اللي كانت جنبي و عشان كدة كنت الأمينة على المكتبة و كنت فرحانة جداً جداً جداً بهذا العمل كنا حابين مكتبة فصلنا و خصوصاص أنا عشان مبقاش فيه دار الكتب اللي كنت بروحله و أقابل فيه مستر محمد عطوة في ناحية الكبار المهم حكايات فصل تانية رابع كتييييييييييرة و نوادره كتيييييييييييييييييرة و هحكيهالكم في المرة الجاية




5

كانت جميلة و رقيقة جداً و كان اسمها جميل جدًا زيها: ميس منال. مدرسة اللغة العربية في فصل تالتة تالت ابتدائي. كان برضو فصل المتفوقين و كان فيه علي محمد إمام و سامر صالح عبد النعيم و أحمد محمد علي و غيرهم...المهم كان سامر صالح صوته حلو أوي بالقرآن و كان له صوت جميل جذب ميس منال عشان تخليه يؤذن كل أذان و مش بس كدة. دي خليته في يوم يؤمنا في الصلاة...كنا كلنا صغيرين و دخلنا في الفسحة مع ميس منال و قام سامر قدامنا و كان الإمام و كل بنت كانت محضرة الطرحة على راسها و صلينا. و كانت ميس منال من الناس الجميلة الي علمتنا و غرست فينا حب الصلاة.بعدين عملولنا مسجد في الدور التاني أو التالت و كانت حيطانه خضرا و جميلة بس بكل أسف المدرسة كانت بتمنع تواجدنا فيه في الفسحة زي ما منعت تواجدنا في الفصول. لكننا كنا برضو بندخل بتشجيع من مدرساتنا و مدرسينا...ربنا يجعل كل أيامنا و تعاليمنا الجميلة في ميزان حسناتهم...المهم مسابقة القرآن الكريم كانت من ضمن المسابقات اللي كنت دايماً بشارك فيها للحفظ مع زملائي الكتار في الفصل. مش كدة و بس كان المدرسين كمان بيختاروني دايماً فيها... و مقدرش أنسى مسابقة القرآن اللي سمعت فيها سورة الفجر و المسابقة اللي سمعت فيها الواقعةكانت أيام جميلة....يا ريت نرجع زمان بالحاجات الحلوة و بس