مفيش واحد قضى في حياته مغامرة؟ أو عمل حاجة كبييييييييييييرة خالص مفرقعة؟
كلهم عملوا نفس الأشياء
ويمكن كلهم حاولوا يعملوا نفس الأشياء وفشل بعضهم
ويجوز اللي فشلوا توقفوا
أو يكونوا كملوا في أشياء تانية بس كلها في نفس الدايرة بالظبط: مذاكرة وشغل وجواز وخلفة
وبعدين نموت كلنا
سبحان الله!!
أنا الحياة بالنسبة لي كانت وما تزال مغامرة
يمكن أكون خضت بعضها وتعرضت فيه ومازلت بتعرض فيه لمشكلات كتيرة وعوائق، لكن لا أنكر إن الحياة بالشكل دا بتخرج عن إطارها الرتيب الممل.
تفتكروا لو أنا بفكر في نفس اللي بيفكروا فيه كل اللي في سني وتجاوزوه أو بيقلوا عنه، هيكون عندي وقت أخوض التجربة وأدخل المغامرة؟
لا أعتقد.,
طب والناس اللي ممكن تنغص عليك حياتك وتقول لك من وقت للتاني: أنتَ العمر جري بيك/ أنتِ القطر فاتك... ما عندكيش طفل تفرحي به وتتهني... ولا عندك حاجة مستقرة...!!!
طب هل الناس دي فكرت في اللي عندها؟
هو الناس دي عندها حاجة سوبر مش عند كل البشر؟
كل الناس عندها أزواج وزوجات عادي يعني وعندهم بيوت بتتقفل عليهم
كل الناس عندهم عيال... ما عملوش يعني المعضلة في حياتهم ولا العيال حاجة صعبة إنها تيجي يعني.
طب ما القطط والكلاب بتتجوز
والحمير والبهايم بتخلف
والناس كمان بتدور في نفس الساقية وبتغمي عيونها.... إيه الجديد؟
طب ليه أضيع فرصة على نفسي وأبص على حياة غيري وأتمنى اللي عنده أو هو يتمنى اللي عندي؟
مش شايفين إن دا مش حلو وبيضيع علينا مغامرات كتيرة وتجارب نعيشها في حياتنا؟
أنا قررت يكون عندي نونو.. هيكون عندي نونو بالتبني... طب مش دا احتيال على الواقع؟
طب ليه ما يكونش الناس منهم طائفة عندها عيال ومنهم طائفة عندها حاجة تانية بتسليها؟
وليه اللي عنده عيال بيغيظ اللي مش عنده بيهم؟
طب ليه اللي عايش حر بيتغاظ منه التانيين؟
هو الأقدار دي شيء بإيدينا؟
طب أنا مش هتحايل على شخص وأحبه ويحبني عشان أخلف منه.
ولا أحب إن حد يتحايل عليَّ عشان ينغص عليَّ حياتي بعد الجواز ونفضل ندور في نفس الدايرة.... ليه بقى المجتمع الواطي ما يسكتش عننا؟
كل واحد حر في حياته
اللي اختار الزواج بعد حيلة ومكر وخديعة يا ريت يرضى بيه لأنه دا اختياره
واللي اختار حياته تمشي من غير زواج وإنجاب يرضى بيه
ولا دا يغيظ دا
ولا دا يغيظ دا
ويا ريت نفتكر إن دا تدبير ربنا
أنا الحمد لله في الدنيا أيام معدودة
وغيري برضو
ليه نعكنن على بعضنا ونبص على بعض ونقرف بعض في العيشة؟
